विज्ञान प्रविधिलाई प्राथमिकता नदिएकै कारण मुलुक पछि परेको हो : मन्त्री शाह

काठमाण्डौं, २८ कार्तिक । वातावरण, विज्ञान तथा प्रविधि मन्त्री गणेश शाहले मुलुकमा इ-क्रान्ति गर्नुपर्ने आवश्यकता भइसकेको बताउनु भएको छ । क्लिक्स् नेपालसँग कुरा गर्दै मन्त्री साहले विज्ञान र प्रविधिको विकास विना प्राप्त राजनितिक उपलब्धि पनि दिगो नहुने भएको कारण इ-क्रान्ति गर्न अब पनि ढिलाई गरेमा मुलुक अझै धेरै पछि पर्ने बताउनु भयो । मुलुकको सामाजिक आर्थिक बिकासकालागि विज्ञान र प्रविधीको विकास र विस्तार अपरिहार्य भएको उहाँको भनाइ थियो ।

विगतका सरकारले विज्ञान र प्रविधिलाई प्राथमिकता नदिएकै कारण मुलुक पछि परेको भन्दै मन्त्री शाहले यो क्षेत्रको विकास र विस्तार नभएकै कारण प्रतिभा पलायन जस्तो गम्भिर समस्या मुलुकको अघि आएको बताउनु भयो । प्राविधिक प्रतिभा पलायन रोक्न मन्त्रालयले तीन महिना भित्र विशेष कार्यक्रम ल्याउने भन्दै मन्त्री साहले विदेशमा रहेको ज्ञान र सीपलाई कसरी अधिकतम रुपमा मुलुकको हितमा उपयोग गर्न सकिन्छ भन्ने विषयमा मन्त्रालयले अध्ययन गरिरहेको बताउनु भयो ।