मन्त्रालयको काम भिडियोबाट

योगेश खतिवडा

 काठमाडौं, ‘सरसफाइ कार्यक्रम कस्तो भो ?,’ वातावरण, विज्ञान तथा प्रविधिमन्त्री गणेश साहले कुर्सीमा बस्दै कम्प्युटरको एलसीडी स्त्रिmनतर्फ फर्केर प्रश्न गरे ।कम्प्युटरमा हाउभाउसहित देखिएका एक व्यक्तिले बोले, ‘निकै राम्रो भयो ।’ आफ्नै कार्यकक्षमा बसेर शुक्रबार मन्त्रीलाई जवाफ फर्काउँदै थिए, मन्त्रालयका सहसचिव राजनराज पन्त ।

उनले तत्काल मन्त्रीलाई सुझाए, ‘हजुरको पूरै अनुहार देखिएन ।’ साहले हत्तपत्त टेबुलमा रहेको एलसीडीलाई अलिकति सोझ्याए, अनि फेरि गफिन थाले ।

वास्तवमै, विज्ञान तथा प्रविधि मन्त्रालयमा अहिले नामअनुसारको काम देखिन थालेको छ । मन्त्री र कर्मचारीहरू आआफ्नै कार्यकक्षमा बसेर काम र कुराकानी भिडियो कन्प|mेन्सिङबाट फत्ते गर्छन् । मन्त्री शाह, सचिव उमेश मैनाली, प्रमाणीकरण नियन्त्रण कार्यालयका नियन्त्रक रहेका पन्त, सहसचिव पुरुषोत्तम घिमिरे र लक्ष्मण मैनालीलगायतका कर्मचारीहरू एकअर्कालाई कम्प्युटरबाट हेर्दै गफिन्छन् ।

‘यो प्रविधि बिहीबारदेखि मात्र सुरु गरेका हौं,’ मन्त्री शाहले भने, ‘यसलाई अन्य मन्त्रालय र संसदमा पनि विस्तार गर्ने योजना छ ।’ धेरै प्रभावकारी हुने भएकाले भिडियो कन्प|mेन्सिङ सुविधा अन्य सरकारी कार्यालयहरूमा विस्तार गर्ने योजना रहेको उनले बताए ।

विज्ञान मन्त्रालय आइपुगेका सूचना तथा सञ्चारमन्त्री कृष्णबहादुर महरा पनि यो प्रविधि प्रयोग गर्न चुकेनन् । ‘दिउँसो आउनुभएको थियो, चलाएर हेर्नु भयो,’ साहले भने, ‘उहाँ पनि निकै प्रभावित हुनुभयो ।’

‘यसलाई प्रदर्शन गरेर अरू मन्त्रालयमा पनि विस्तार गर्ने योजना छ,’ सचिव मैनालीले भने । इन्टरनेट प्रयोगकर्ताले भिडियो कन्प|mेन्सिङ गर्न सफ्टवेयर डाउनलोड गरेपछि पीसी क्यामेरा र स्पिकर भए पुग्छ ।